Մաշկի գարնանային խնամքը

Գարնանը մաշկը ջրազրկման հետեւանքով կորցնում է առաձգականությունը։ Խոնավության պակասից հատկապես չոր կամ խառը տիպի մաշկը մի տեսակ խամրած է թվում, շոշափելիս այնքան էլ նուրբ չէ եւ նկատելիորեն թեփոտում է։ Երբեմն էլ խիստ զգայուն է դառնում։

Ճարպոտ մաշկը ջրազրկվելիս լայնացած ծակոտիներ ու մոխրագույն երանգ է ունենում, երբեմն էլ՝ թեփոտում։ Կարեւորը փորձարարական եղանակով խոնավացնող նախընտրելի միջոց ընտրելն է։ Դրանք մաշկը չորանալուց պաշտպանում են մի քանի ճանապարհով։ Նախ օդից խոնավություն են քաշում եւ փոխանցում մաշկի։ Միաժամանակ, մաշկի վրա պաշտպանական նուրբ թաղանթ են կազմում՝ թույլ չտալով, որ այն գոլորշանա, բարելավում են մաշկի ձգությունը։

Սակայն պետք չէ հուսալ, թե խոնավացնող միջոցները կարող են կանխել կնճիռների առաջացումը։ Խոնավացնող միջոցը պետք է համապատասխանի մաշկի տիպին, լինի առանց գունանյութերի, թեթեւ ու ոչ շատ յուղոտ եւ լավ ներծծվի։ Եթե կրեմի կամ խոնավացնող այլ միջոցի մեջ կոլագեն, մայրական կաթ կամ ալոե վերա կա, ապա այն պետք է պահել սառը տեղ։ Եթե պիտակի վրա այդ մասին չի հիշատակված, ուրեմն բաղադրության մեջ ակտիվ նյութերի քանակը շատ քիչ է, եւ ավելի լավ է ուրիշ միջոց ընտրել։

Խառը տիպի մաշկի խնամքն առավել դյուրին է։ Կարելի է օգտագործել ցանկացած մաշկի համար նախատեսված խոնավացնող քսուկ։ Զգայուն եւ չոր մաշկի համար շատ արդյունավետ են մեղրամոմի հիմք ունեցող բալզամները, որոնք լավ են ներծծվում։ Պետք է խուսափել նավթամթերքների հիմքով պատրաստված բալզամներից։ Դրանք լավ են միայն շուրթերի համար։ Էմուլսիաները, հեղուկներն ու քսուկները (գել) շատ արդյունավետ են յուղոտ մաշկի համար։ Դրանք գլխավոր ակտիվ բաղադրիչի՝ դիմետիկոնի շնորհիվ նվազեցնում են մաշկի յուղոտ փայլը, չեն խցանում ծակոտիները եւ հարթ ու նուրբ են դարձնում մաշկը։ Ճարպոտ մաշկ ունեցողները պետք է խուսափեն հանքային յուղերից, հանքային մոմից եւ ընտրեն խոնավությունը պահող նյութեր պարունակող միջոցներ։ Բայց, չմոռանաք, որ լավագույն քսուկն անգամ չի օգնի, եթե մաշկը նախապես չմաքրվի։ Ջրազրկված մաշկն ավելի լավ է ջրով չլվանալ, այլ մաքրել հագեցած կոսմետիկ կաթով ու խոնավացնող լոսյոնով եւ անմիջապես՝ առանց ժամանակ կորցնելու, քսել խոնավացնող քսուկը։

Այդպիսով խոնավությունն ավելի լավ կպահպանվի։ Խոնավացնող միջոցի արդյունավետությունն ստուգելու համար կարելի է փոքրիկ թեստ կատարել։ Կրեմը կամ լոսյոնը քսեք մաշկին, ապա երկու ժամ հետո այտի ստորին մասում՝ ծնոտի մոտ, կպչուն ժապավենի մի փոքրիկ կտոր կպցրեք ու կտրուկ շարժումով պոկեք։ Եթե այն պատված է մաշկի թեփոտված մասնիկներով, ապա ավելի արդյունավետ միջոց փնտրեք։ «SPF» տարբերանշանով քսուկներն օգտագործվում են միայն ցերեկը։ Հակառակ դեպքում ուլտրամանուշակագույն զտիչները կարող են խցանել ծակոտիները եւ խախտել մաշկի ֆունկցիան։ Հիշեք, որ դեմքի կրեմները պիտանի չեն կոպերի խնամքի համար։ Դրանք մաշկի այդ գերզգայուն հատվածի համար շատ ծանր են եւ կարող են այտուցներ կամ ալերգիկ երեւույթներ առաջացնել։ Եթե նույնիսկ մաշկը խիստ ջրազրկված է, չարժե այն խոնավացնել նաեւ գիշերը։ Երեկոյան սնուցող կրեմն ավելի տեղին կլինի։ Չմոռանաք, որ գարնանը խոնավացնող միջոցների կարիք են զգում նաեւ պարանոցն ու կուրծքը։ Իսկ, այ, քիթը դրա կարիքը, սովորաբար, չի զգում։

Հարցեր, պատասխաններ, մեկնաբանություններ